Pages

Friday, December 15, 2017

මල් කැකුළු ඇත හැංගී

අඳුරු වන වඳුලක  
කටු කොහොල් අතරත 
දෙපා සීරී ලේ ගලන
වේදනා සනහන්නට  
මල් කැකුළු ඇත හැංගී 
ඉදහිට... 

කාශ්ටක කතරක 
දැවෙන වැලි අතරත 
ලය පුරා නැගෙන 
සරතැස සනහන්නට 
මල් කැකුළු ඇත හැංගී 
ඉදහිට... 

අදමිටු ලොවක 
සදොස් දන අතරත 
බැට කා හුදෙකලා වුන 
මිලින හදවත සනහන්ට 
මල් කැකුළු ඇත හැංගී 
ඉදහිට..

Friday, December 8, 2017

අතැහැරුනු මල

හිත් මැද
පාළු වූ පුදසුනක
පුදන්නට
දෝත පුරා
ලමැදට තුරුල් කර
රැකගත්
එකම මල ගිලිහුණි
අඳුරු රැයෙක
එක් අසුරු සැනෙයක

දෑඟිලි තුඬඟින්
නික්මෙන
සිහින් මල් සුවඳක්
හීනියට රිදවයි සිත
අකාලේ වියැකුණු
සුසිනිඳු මල් පහස
ලය මත ශේෂකර
අහිමි වීමක
ගැඹුරු කැළැලක්

සිතින් නොහරින
මතක විල මැද
සදාකල් නොමියෙන
අතැහැරුනු මල....

Friday, November 24, 2017

එකම අයැදුම

සුසුම් කැටි
මා හුළඟට මුහු කරන
නුඹේ කොපුල්
තෙමූවත් නොතෙමූවත්
නුඹේ චායා
නොමැකෙයි හදින්...

මතු යම් දිනක
අවසන් නිද්‍රාවෙහි
මා ගිලෙන සඳ
දකින අවසන් සිහිනයටද 
එතෙකුන් ගෙවෙන
හැම රැයකමත් 
සිහිනෙන් වඩින්න
දෙව්දුව....
එයම පමණකි
නුඹෙන් අයදින
එකම දෙය....

Wednesday, November 22, 2017

වියැකෙණ ආත්මය

අහස් කොනක
දහවලක් සොඳුරු කර
කෝළ වී හැංගුනු 
වළා සේලයක් සේ 
නුඹ....
සිත් කොනක 
සොඳුරු සිතුවමක කැලැලක් 
ඒ මතින් හමන 
අහිමිවීමක සුවඳක්
පමණක්ම ශේෂකර 
සීරුවෙන් කෙමින් 
වියැකෙන කාරණා 
වියකුල්....

පපුතුරේ දැල්වෙන 
ගිණි සනහන   
සිහිල් දිය දහරක් වූ නුඹමැ 
දාහිත හිරු වූ ලොවක, 
පණ ගැස්මටද
දෙදරයි 
ඉරිතලයි 
වියැලුණු හද...

නුඹ මවාගත්
මායා යතාර්තයේ 
ශෝකාන්තයකි පෙළ 
එහි මල් ඉකි ගසයි 
තටු සිඳී සමනලුන් 
මුලාවූ සිතුවිලි 
මිරිඟු ලාලසාවන් 
ඒ සියල් මැද 
ගත හරින 
ආත්මය...

Tuesday, November 21, 2017

ජීවිතය ජීවිතයක් විය

අයාලේ
මාරුතයේ පාවී
අරුතක් සොයා යන
පඩුවන් පතක් විය ජීවිතය...
සාගර පතුලෙන්
කදු ශිඛර මතින්
තුරු ලතා අතරින්
මල් පෙති මතින්
ජීවිතය නොලද ජීවිතය...
දුහුවිලි වැකුනු වීදි අතරින්
දිදුලන පහන් එළියෙන්
ගුගුරන දෝංකාර ශබ්දයෙන්
ගත දවන හුළඟෙන්
ජීවිතය නොලද ජීවිතය...
ඈත් මෑත් වන පහසින්
සවන් පුරවන මැසිවිල්ලෙන්
උරහිස් දවාලන සුසුමෙන්
පිපිරී යන ආශාවෙන්
ජීවිතය නොලද ජීවිතය...
නොදැනී හැඟුනු
නෑසී ඇසුනු
නොපෙනී මැවුනු
නොතේරී වැටහුණු
නුඹේ ආදරයෙන්,
ජීවිතය ජීවිතයක් විය...

Monday, November 20, 2017

හිස් දෙවොල්

දෙවියන් විසිය යුතු 
දෙවියන්ටම තැනූ 
දෙව් මැදුරු අරා 
පිසාචයන් 
කෙලෙසයි 
ප්‍රේමයේ හිරිඔතප්...

දෙවිවරු ලොවේ නැත 
කිසිදා සිටියේද නැත 

හිස් 
දෙවොල් 
තැන තැන...

Saturday, November 4, 2017

වසන්තය

වළා පහව
නැගෙන නැවුම් සඳ
ගෙනෙන්නේ
වසන්තයයි
මිලින අහසට

සිත් ඉම කොනක
තනිකම ඉරාගෙන
සුපිපෙන ආදරයක්
ගෙනෙන්නේ
වසන්තයයි
පුරන් සිතකට...